Міндетті әлеуметтік медициналық сақтандыру туралы заңға енгізілген өзгерістерге байланысты жеке кәсіпкерлер қарамағындағы еңбеккерлер үшін медициналық сақтандыру қорына ай сайын аударымдар жасауға міндетті. Алайда, ол ережеге бағынбай отырғандар өңірде аз емес.
«Міндетті әлеуметтік медициналық сақтандыру туралы заңға сәйкес жұмыс беруші жалақының 1,5 пайызы көлемінде қорға ай сайын аударымдар жасап тұруы тиіс. Бүгінде бұл талапты Петропавл қаласы бойынша бір мыңға жуық кәсіпкер орындамаған. Медициналық сақтандыру қорына тиісті сома аударылмаса,адамдарға тегін дәрігерлік көмек көрсетілмейді», дейді қалалық мемлекеттік кірістер басқармасының бөлім басшысы Наталья Елмурадова.
Оның айтуынша медициналық сақтандыру қорына жарна төлемеу әкімшілік құқықбұзушылық болып есептеледі. Бірінші рет ереже бұзған салық төлеушіге ескерту беріледі. Банк шоттары мен қаржы операцияларына уақытша шектеу қойылады.
Аталған фактілер бойынша 50 салық төлеушіге қатысты әкімшілік іс қозғалған. 226 жұмыс беруші ескерту алған.
Өмір Есқали,
«Егемен Қазақстан».
Солтүстік Қазақстан облысы.
